Buddhism-ནང་ཆོས།

མི་རྟག་པ་ཉིད་ཀྱི་མདོ

Impermanence

རྒྱ་གར་སྐད་དུ། ཨ་ནི་ཏྱ་ཏཱ་སཱུ་ཏྲ། བོད་སྐད་དུ། མི་རྟག་པ་ཉིད་ཀྱི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག། འདུ་བྱེད་ཐམས་ཅད་མི་རྟག་པ་དང ། མི་བརྟན་པ་དང ། ཡིད་བརྟན་དུ་མི་རུང་བ་དང ། ཡོངས་སུ་འགྱུར་བའི་ཆོས་ཅན་ཏེ། དགེ་སློང་དག་།ཆོག་གི་འདུ་བྱེད་ཐམས་ཅད་ལས་སེམས་ཟློག་ཅིག་།དགེ་སློང་དག་།མ་ཆགས་པ་དང ། མ་ཞེན་པ་དང ། རྣམ་པར་གྲོལ་བར་གྱིས་ཤིག་།གང་ཡང་སེམས་ཅན་ཐམས་ཅད་དང ། འབྱུང་པོ་ཐམས་ཅད་དང ། སྲོག་ཆགས་ཐམས་ཅད་ཀྱི་གསོན་པའི་མཐའ་ནི་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུའམ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའམ། རྒྱལ་རིགས་ཤིང་སཱ་ལ་ཆེན་པོ་ལྟ་བུ་ཕྱུག་པ། ནོར་མང་བ། ལོངས་སྤྱོད་ཆེ་བ། ནོར་བུ་དང ། མུ་ཏིག་དང ། བཻ་ཌཱུརྱ་དང ། ཤང་ཀ་ཤི་ལ་དང ། བྱུ་རུ་དང ། གསེར་དང ། དངུལ་དང ། ནོར་དང ། ལོངས་སྤྱོད་མང་བ་དང ། འབྲུ་དང ། དབྱིག་དང ། གསེར་དང ། མཛོད་དང ། བང་བ་བ་སགས་པ་མང་བ་དང ། བྲན་ཕོ་དང ། བྲན་མོ་དང ། ཞོ་ཤས་འཚོ་བ་མང་བ་དང ། མཛའ་བཤེས་དང ། ཉེ་དུ་དང ། སྣག་གི་གཉེན་མཚམས་མང་བ་དེ་དག་གི་གསོན་པའི་མཐའ་ཡང་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། ཡུལ་ལ་དབང་བ། མཐུ་ཐོབ་པ། ས་ཆེན་པོའི་དཀྱིལ་འཁོར་དུ་མངོན་པར་རྒྱལ་བས་གནས་པ་དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་དྲང་སྲོང་ནགས་ན་གནས་པ་རྩ་བ་དང ། འབྲས་བུ་ཟ་ཞིང་རྩ་བ་དང ། འབྲས་བུ་ལ་སྤྱོད་པ། རྩ་བ་དང ། འབྲས་བུས་འཚོ་ཞིང་གནས་པ་དེ་དག་གི་གསོན་པའི་མཐའ་ཡང་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་རྒྱལ་ཆེན་བཞིའི་རིས་ཀྱི་ལྷ་རྣམས་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་ཏེ། དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་གཟུགས་ཅན་གྱི་ལྷ་རྣམས་ཏེ།་བསམ་གཏན་དང་པོ་ཐོབ་པ། ཚངས་རིས་དང ། ཚངས་པ་མདུན་ན་འདོན་དང ། ཚངས་ཆེན་ཏེ། དེ་དག་གིའང་གསོན་པའི་མཐའ་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་བསམ་གཏན་གཉིས་པ་ཐོབ་པའི་ལྷ་རྣམས་ཏེ། འོད་ཆུང་དང ། ཚད་མེད་འོད་དང ། འོད་གསལ་བ་སྟེ། དེ་དག་གིའང་གསོན་པའི་མཐའ་འཆི་བ་ཡིན་ཞིང་མཐར་འཆི་བར་འགྱུར་པ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་བསམ་གཏན་གསུམ་པ་ཐོབ་པའི་ལྷ་རྣམས་ཏེ། དགེ་ཆུང་དང ། ཚད་མེད་དགེ་དང ། དགེ་རྒྱས་པ་སྟེ། དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་ཡང་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་བསམ་གཏན་བཞི་པ་ཐོབ་པའི་ལྷ་རྣམས་ཏེ། སྤྲིན་མེད་དང ། བསོད་ནམས་འཕེལ་དང ། འབྲས་བུ་ཆེ་བ་དང ། འདུ་ཤེས་མེད་པའི་སེམས་ཅན་དང ། མི་ཆེ་བ་དང ། མི་གདུང་བ་དང ། ཤིན་ཏུ་མཐོང་བ་དང ། གྱ་ནོམ་སྣང་དང ། འོག་མིན་གྱི་ལྷ་རྣམས་ཏེ། དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་གཟུགས་མེད་པའི་ལྷ་རྣམས་ཏེ། ནམ་མཁའ་མཐའ་ཡས་སྐྱེ་མཆེད་དུ་ཉེ་བར་གཏོགས་པ་དང ། རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་གཏོགས་པ་དང།་ཅིའང་མེད་པའི་སྐྱེ་མཆོད་དུ་ཉེ་བར་གཏོགས་པ་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་གཏོགས་པའི་ལྷ་རྣམས་ཏེ། དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །གང་ཡང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་བ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་ནམ་པའི་ཕ་རོལ་ཏུ་སོན་བ་དེ་རྣམས་ཀྱང་ཡིད་དུ་འོང་བའི་ལུས་སྤོང་བར་ཕྱག་པའི་ཆོས་ཅན་ནོ། །གང་ཡང་རང་སངས་རྒྱས་བསེ་རུ་ལྟ་བུ་དང ། ཚོགས་ན་སྤྱོད་པ་བདག་ཉིད་གཅིག་པུ་འདུལ་བར་བྱེད་ཅིང་བདག་ཉིད་ཞི་བར་བྱེད་ལ། བདག་ཉིད་ཡོངས་སུ་མྱ་ངན་ལས་འདའ་བར་བྱེད་པ་དེ་རྣམས་ཀྱང་ཡིད་དུ་འོང་བའི་ལུས་སྤོང་བར་བྱེད་པའི་ཆོས་ཅན་ནོ། །གང་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་བཅུའི་སྟོབས་དང་ལྡན་པ། མི་འཇིགས་པ་བཞིས་བསྙེངས་པ་མི་མངའ་བ།་ཁྱུ་མཆོག་གི་གནས་སུ་ཞལ་གྱིས་འཆེ་བ། སྐུ་ལ་སྲེད་མེད་ཀྱི་སྟོབས་བརྟན་པ་འདུས་པ། སེང་གེའི་སྒྲ་ཡང་དག་པར་སྒྲོགས་པ་དེ་རྣམས་ཀྱང་ཡིད་དུ་འོང་བའི་སྐུ་སྤོང་བར་མཛད་པའི་ཆོས་ཅན་ནོ། །དགེ་སློང་དག་།འདི་ལྟ་སྟེ། རྫ་མཁན་གྱི་སྣོད་རྣམས་བྱས་པ་ནི། སོ་བཏང་བའམ། སོ་མ་བཏང་བ་དེ་དག་ཐམས་ཅད་ཀྱང་འཇིག་པ་དང ། མཐར་ཟད་པར་འགྱུར་རོ། །དགེ་སློང་དག་།དེ་བཞིན་དུ་སེམས་ཅན་ཐམས་ཅད་དང ། འབྱུང་པོ་ཐམས་ཅད་དང ། སྲོག་ཆགས་ཐམས་ཅད་ཀྱི་གསོན་པའི་མཐའ་ནི་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་བཀའ་སྩལ་ཏོ། །ཀྱེ་མ་འདུ་བྱེད་རྣམས་མི་རྟག་།སྐྱེ་ཞིང་འཇིག་པའི་ཆོས་ཅན་ཡིན། །སྐྱེས་ནས་འཇིག་པར་འགྱུར་བ་སྟེ། །དེ་བས་ཉེ་བར་ཞི་བ་བདེ། །དེ་ལྟར་རབ་ཏུ་འབར་བ་ལ། །དགར་བྱར་ཅི་ཡོད་མགུར་ཅི་ཡོད། །མུན་པའི་ནང་ཞུགས་གནས་པ་དག་།ཅི་ཕྱིར་སྒྲོན་མ་ཚོལ་མི་བྱེད། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །མི་རྟག་པ་ཉིད་ཀྱི་མདོ་རྫོགས་སོ།། །།

1518
Please follow and like us:

Leave a Reply